Ozzy Osbourne

Sino ito?

Si John Michael "Ozzy" Osbourne (3 Disyembre 1948 – 22 Hulyo 2025) ay isang Ingles na mang-aawit, manunulat ng kanta, at personalidad sa media. Siya ang isa sa mga nagtatag ng bandang heavy metal na Black Sabbath noong 1968, at sumikat noong dekada 70 bilang bokalista. Siya ay tinaguriang "Prince of Darkness" (lit. "Prinsipe ng Kadiliman") dahil sa kanyang persona at mga awitin na kalimitan ay tungkol sa kababalaghan. Ang banda ay nagpasimuno ng heavy metal na musika, lalo na sa kanilang mga album na Black Sabbath, Paranoid (parehong 1970) at Master of Reality (1971). Napatalsik si Osbourne sa Black Sabbath noong 1979 dahil sa kanyang pagkalulong sa alkohol at mga ipinagbabawal na gamot, ngunit mag-isa niyang napagtaguyod ang isang matagumpay na karera noong 1980 noong inilabas niya ang Blizzard of Ozz, na sinundan pa ng labintatlong mga album. Noong kasagsagan ng isterya laban sa Satanismo noong dekada 80 ("Satanic Panic"), inakusahan si Osbourne ng mga konserbatibong Kristiyano ng pagsusulong ng Satanismo; itinanggi niya at kanyang mga ka-banda ang mga paratang at nanindigan siya sa pagiging Kristiyano bilang miyembro ng Simbahan ng Inglatera.