Ovidio

Sino ito?

Si Publius Ovidius Naso (20 Marso 43 BCE – 17/18 CE), na mas nakikilala bilang Ovid lamang o kaya ay Ovidio at Publio Ovidio Nasón, ay isang Romanong makata na higit na nakikilala bilang ang may-akda ng tatlong pangunahing kalipunan ng panulaang erotiko: ang Heroides ("Kababaihang Bayani"), ang Amores ("Mga Pag-ibig"), at ang Ars Amatoria ("Sining ng Pag-ibig"), at pati ng Metamorphoses ("Mga Pagbabagong Anyo" o "Mga Transpormasyon"), isang tulang heksametro at mitolohikal. Nakikilala rin siya dahil sa Fasti ("Mga Pestibal") na hinggil sa kalendaryong Romano; at ng Tristia ("Mga Kalungkutan") at ng Epistulae ex Ponto ("Mga Liham mula sa Itim na Dagat"), dalawang katipunan ng mga tulang nasulat habang namamalagi sa Itim na Dagat pagkalipas na mapalayas siya mula sa kaniyang pook na pinaninirahan. Si Ovid ay may-akda rin ng ilang mas maliliit na mga piraso ng mga akda, ang Remedia Amoris, ang Medicamina Faciei Femineae, at ang mahabang tulang sumpa na Ibis. Inakdaan din niya ang isang nawawalang trahedya, ang Medea.