Mila del Sol

Sino ito?

Si Clarita Villarba Rivera, mas kilala sa kanyang pangalang pang-entablado na Mila del Sol (Mayo 12, 1923 – Nobyembre 10, 2020), ay isang artista, negosyante at pilantropo na mula sa Pilipinas. Ipinanganak sa Tondo, Maynila, natamo niya ang kasikatan nang una siyang gumanap bilang punong tauhan sa pelikula noong 1939 na Giliw Ko. Natuklasan siya ng Pangulo ng LVN Pictures na si Doña Sisang de Leon, na iginiit na mapasama siya sa pelikula na tinutulan ng direktor ng pelikula, na naramdaman na bata pa siya para ganapin ang karakter. Si Carlos Vander Tolosa, ang direktor ng pelikula, ang nagbansag sa kanya ng pangalang Mila del Sol dahil sa "pagpapalabas ng araw (sol) na parang isang milagro sa kanyang madilim na set kapag tinatawag siya upang gawin ang kanyang mga eksena." Natigil ang paggawa ng pelikula noong pag-okupa ng mga Hapon at nanumbalik lamang noong 1945. Nagbalik si Del Sol sa LVN at bumida sa produksyon ni Manuel Conde na Orasang Ginto, ang unang pelikulang Pilipino pagkatapos ng Ikalawang Digmaang Pandaigdig. Bumida din siya sa ibang pelikula ng LVN noong dekada 1940, kabilang ang Ibong Adarna (1949) at Villa Hermosa.