Kris Aquino

Sino ito?

Si Kristina Bernadette Aquino-Yap (ipinanganak bilang Kristina Bernadette Cojuangco Aquino noong 14 Pebrero 1971 sa Lungsod Quezon), o mas kilala bilang Kris Aquino, ay isang Pilipinang tagatanghal sa telebisyon, tagapamahala ng talento, prodyuser, at aktres sa telebisyon at mga pelikula. Kapansin-pansing lumabas siya bilang si Prinsesa Intan sa pelikulang Crazy Rich Asians, at tumatanggap ng 42 Gawad PMPC Star Awards para sa Telebisyon, 10 Gawad Golden Screen at isang Gawad FAMAS. Siya ang panlima at bunsong anak nina dating Pangulong Corazon Aquino at Senador Benigno Aquino, Jr.. Unang nakilala si Aquino sa mga welga laban sa pamahalaang Marcos lalo na nang sumikat ang kanyang ina sa politika. Nang napatalsik si Ferdinand Marcos noong 1986, pinasok niya ang showbiz. Nagsimula siya sa mga guest spots sa mga drama at komedya sa telebisyon, maging ang mga talk shows. Ang unang pelikula niya ay ang Pido Dida kasama si Rene Requiestas, isang aktor ng komedya. Naging nominado siya para sa pelikulang The Fatima Buen Story. Kasama rin siya sa pelikulang The Vizconde Massacre.