Jennifer Lopez

Sino ito?

Si Jennifer Lynn Lopez (ipinanganak 24 Hulyo 1969), na kilala rin sa palayaw na J.Lo, ay isang Amerikanang aktres, mang-aawit, prodyuser, mananayaw, personalidad sa telebisyon, 'fashion designer' at prodyuser sa telebisyon. Nagsimula ang karera ni Lopez bilang isang mananayaw sa isang programang komedyang pantelebisyon na In Living Color. Pagkatapos ay sumabak sa pag-arte, at nakilala sa pelikulang Money Train. Una siyang nagbida sa pelikulang talambuhay na Selena noong 1997, kung saan umani siya ng ALMA Award para sa Katangi-tanging Aktres. Nakuha niya ang kanyang ikalawang ALMA Award para sa kanyang pagganap sa Out of Sight (1998). Simula noon ay nagsimula na siyang bumida sa iba't ibang pelikula, gaya ng 'The Wedding Planner (2001), Maid in Manhattan (2002), Shall We Dance? (2004), Monster-in-Law (2005), at The Back-up Plan (2010). Naabot ni Lopez ang katanyagan sa industriya ng musika pagkatapos ilabas ang kanyang unang studio album na On the 6 (1999) kung saan nakapaloob ang nangunang single nito na "If You Had My Love". Ang kanyang ikalawang studio album J.Lo (2001) ay naging matagumpay, na nakabenta ng walong milyong sipi sa buong mundo.