Jacinto Zamora

Sino ito?

Si Padre Jacinto Zamora y del Rosario ay isang pari na isinilang noong Agosto 14, 1835 sa Pandacan, Maynila. Ang kanyang mga magulang ay sina Venancio Zamora at Hilaria del Rosario. Nag-aral si Zamora sa Colegio de San Juan de Letran na kung saan ay natapos niya ang kursong Bachiller en Artes. Nagpaluloy siya ng pag-aaral sa Unibersidad ng Santo Tomas na kung saan naman ay natamo niya ang diploma para sa kursong Bachiller en Leyes Canon. Si Padre Zamora ay hindi kasinghusay nina Padre Burgos at Padre Gomez subalit sya ay nakakuha rin ng mataas na marka sa pagsusulit na kinuha nya noong sya ay pansamantalang natalaga sa Parokya ng Pasig. Sa kabila ng mataas na marka at pagkakapasa sa pagsusulit, si Padre Zamora ay hindi binigyan ng pangmatagalang pagkalagak sa dahil isa lamang syang "indio". Lumipat ng Maynila si Padre Zamora kalaunan. Nang maganap ang himagsikan sa Cavite noong Enero 1872, sya ay dinakip at ikinulong sa Fort Santiago. Siya ay isa sa pinagbintangang namuno sa pag-aalsa laban sa Kastila, kasama ni Padre Jose Apolonio Burgos at Padre Mariano Gomez. Siya ay kasamang binitay noong Pebrero 17, 1872 sa pamamagitan ng garote.