Fernando Poe

Sino ito?

Si Ronald Allan Kelley Poe (20 Agosto 1939 – 14 Disyembre 2004), higit na kilala bilang Fernando Poe Jr., ay isang dating aktor, direktor, politiko sa Pilipinas na isang idolo at maraming nakakakilala. Kilala rin siya sa mga palayaw na FPJ o Da King. Ginagamit niya ang alyas na Ronwaldo Reyes sa mga pelikulang siya ang direktor. Kabatirang pansarili Ipinanganak si Fernando Poe Jr. noong 20 Agosto 1939 sa Maynila, Pilipinas, kina Fernando Poe, Sr., isang ring dating aktor, at Elizabeth Gatbonton Kelley na taga Candaba, Pampanga na may Amerikanong magulang. Ang orihinal na apelyido ng pamilya ay binaybay na Pou, mula sa kanyang mandudulang lolo na si Lorenzo Pou, isang Katalan mula sa Mallorca, na namuhay sa Pilipinas upang magnegosyo. Pinakasalan niya ang aktres na si Susan Roces noong Disyembre 1968 sa isang seremonyang sibil. Ikinasal din sila sa simbahang Katoliko at sina Ferdinand Marcos at Imelda Marcos (na Pangulo at Unang Ginang ng Pilipinas noong mga panahon na iyon) ang mga naging ninong at ninang. Si Mary Grace lamang ang kanilang anak na ampon. Bagaman, isang kilalang tao si Poe, hindi siya gaanong bukas sa kanyang pansariling buhay.