Bryan Adams

Sino ito?

Si Bryan Guy Adams, OC OBC (ipinanganak noong 5 Nobyembre 1959) ay isang mang-aawit, kompositor at litratista na Kanadyano. Si Adams ay nakilala sa Hilagang Amerika sa kanyang album na Cuts Like a Knife at naging tanyag sa buong mundo sa kanyang album na Reckless noong 1984. Dahil sa kanyang mga naiambag sa larangan ng musika, si Adams ay nakakuha ng maraming parangal at nominasyon, kasama na ang 20 Juno Awards sa 56 na nominasyon, 15 na nominasyon sa Grammy Award kabilang ang pagkapanalo sa Best Song Written Specifically for a Motion Picture or Television dahil sa kanyang kantang "(Everything I Do) I Do It For You" noong 1992. Nanalo rin siya ng MTV, ASCAP, American Music Awards, dalawang Ivor Novello Awards para sa kanyang pagsusulat ng awitin at limang beses na naging nominado sa Golden Globes awards at tatlong beses sa Academy Awards dahil sa kanyang mga komposisyon na para sa mga pelikula. Si Adams ay naparangalan ng Order of Canada at Order of British Columbia dahil sa kanyang mga kontribusyon sa larangan ng tanyag na musika at mga gawain sa charity sa pamamagitan ng kanyang sariling pundasyon, na tumutulong mapabuti ang pag-aaral ng mga tao sa buong mundo.