AKB48

Sino ito?

Ang AKB48 ay isang idol group na binubuo ng mga kababaihan mula sa Hapon. Ito ay kinonsepto at binuo ni Yasushi Akimoto. Ang grupo na ito ay nagtamo ng malawak na popularidad sa Hapon. Ang siyam na pinakabagong singles nila ay nanguna sa Oricon Weekly Singles Chart. Ang mga single nila na "Beginner" at "Heavy Rotation" ay kapwa naging una at pangalawa sa pinakamabentang single sa Hapon ng taong 2010. Samantala, ang mga single naman na Everyday, Kachuusha, Sakura no Ki ni Naro at Flying Get ang kasalukuyang nangunguna sa mga listahan ng mabentang single ngayong 2011. Ang AKB48 ay hango sa Akihabara, isang lugar sa Tokyo kung saan matatagpuan ang Don Quijote. Sa ika-walong palapag ng nasabing lugar makikita ang sariling teatro ng AKB48, kung saan sila nagtatanghal. Ang ideya ni Akimoto ay gumawa ng isang grupo na nagtatanghal sa teatro kung saan maaari silang makita araw-araw ng kanilang mga tagahanga; kinalaunan tinawag ang konseptong ito bilang "idols you can meet" (mga idolong maaaring makahalubilo). Nagtatanghal parin ang AKB48 sa teatro nila, ngunit ang mga tiket ay pinalolotarya na lamang dahil sa dami ng gustong makapanood ng pagtatanghal nila sa teatro.