Adam Levine

Sino ito?

Si Adam Noah Levine (ipinanganak Marso 18, 1979) ay isang mang-aawit, manunulat ng mga awitin, instrumentalista at aktor na Amerikano. Siya ang pangunahing bokalista ng Maroon 5, isang bandang pop rock na mula sa Los Angeles. Si Levine ay ipinanganak at lumaki sa Los Angeles, California. Sinimulan niya ang kaniyang karera sa musika noong 1994. Isa siya sa bumuo ng bandang alternative rock na pinangalanang Kara’s Flowers, kung saan siya ang pangunahing bokalista at gitarista. Ang bandang ito ay naghiwalay din matapos mailabas noong 1997 ang kanilang nag-iisang album, The Fourth World, na hindi naman sumikat. Noong 2001, muling nabuo ang banda – kasama ang bagong gitarista na si James Valentine – bilang Maroon 5 at nagumpisa ng bagong kabanata sa musika. Noong 2002, inilabas nila ang kanilang unang album, Songs About Jane, na naging multi-platinum sa Estados Unidos. Matapos noon ay nakapaglabas sila ng apat pang mga album: It Won't Be Soon Before Long (2007), Hands All Over (2010), Overexposed (2012) at V (2014).